يوميات صــمــــت الجبال على قهوة المــــــصريين00متجددة يوميا

صمت الجبال · #1 11-19-2008, 08:48 AM

ازايكم يا ردالة
انا مش عاوز اى حد يتخنق منى من اولها كدة 00خف تعوم من غير هدوم

يوم الجمعة متعود بعد صلاة الضهر اطلع على قهوة المصر يين اقابل الجرعان بتوع المنطقه .. نقعد نرغي في أي حوار قد ساعه ولا اتنين واحنا بنحتسي القهوة والبيبس .. ولو اننا بطلنا نحتسي البيبس لأنها غليت وبقو بيقدموها باتنين جنيه بحالهم .. مع انهم مابيعملوش أي بتاع غير ان واحد يروح يجيبها من السوبرماركو اللي جنب القهوة .. ويفتحها في القهوة ويقدمها على صينية وجنبها كباية ميه من الحنفيه .. مش إعجاز يعني
ام هند .. قابلت واحد صاحبي متجوز ومخلف مافيش شهرين مثلا .. وسألني صاحبي ده عن واحد صاحبنا لسه متجوز من اسبوع .. وقلتله ماعرفش عنه حاجه وشكله فُقد في ظروف غامضه .. ولقيت صاحبي الاولاني بيقوللي
انت مش ناوي تتجوز بقى يا00صمت .. اتكل على الله والجواز نص الدين .. الخ الخ الخ
شويه ولقينا واحد صاحبنا متجوز من بتاع ست شهور ولا حاجه .. جاي ومخنوق وبينفخ وينطر وشكله على آخره .. افتكرته في الاول مخنوق من ارتفاع الاسعار والحاله الماديه اللي البلد فيها .. لقيته بيقولي
لعلمك .. آخر حاجه الواحد بيشيل همها في الجواز هي الفلوس .. المهم ان اللي تتجوزها تكون دماغها حلوة
وفجأة لقيت صاحبي اللي كان بيحرضني عالجواز من شويه .. بيؤكد على كلامه .. وابتدو الاتنين يشكو همهم لبعض .. وده مراته اتخانقت معاه عشان مش عارف ايه .. والتاني مراته عملت إيه .. مع انها عارفه انه مش بيحب الإيه اللي عملته .. باختصار .. مش مرتاحين في جوازاتهم وعندهم مشاكل بسبب زوجاتهم
!!!!!!!
مشيت مروّح البيت لقيت واحد صاحبي خاطب بقاله بتاع شهرين وبيجهز شقته .. ماشي في الشارع بيكلم روحه يا كبدي .. في ايه ياعم مالك .. قاللي
حماتي ياعم مطلعه عيني وعايزاني اجيب المايكروويف مع انه من مستلزمات المطبخ ودي عالعروسه .. ولما قلتلهم خلاص هاتو انتو النجفه بتاعة الانتريه .. قالو لأ المعلقات عليك .. وشكلي هعلق نفسي مكان النجفة وانتحر بسببهم عشان يرتاحو
!!!!!!!!
بعد ما اتغديت قلت اتصل بواحد كان معايا في الكليه .. صاحبي ده اتجوز واختفى وماعرفش عنه حاجه من بعدها .. لقيته بيقولي
اسكت .. مش مراتي سابت البيت وبعتت اخوها ومعاه بلطجيه راحو مفوّرين باب الشقه وكسروه .. وسرقو العفش .. لأ وايه .. رافعه علي قضية تبديد منقولات وعايزه تحبسني
!!!!!!!!
زهقت من القعده في الفراغ .. قمت داخل عالنت .. لقيت صاحبي اللي متجوز ومتغرب في الكويت .. بيشكيلي ان مراته اتخانقت معاه وسابتلو البيت .. وخلّفت وجابت بنت .. ولما جه يروح يزورها ويشوف بنته .. اخوات مراته اتعرضوله ومنعوه وكانو هيضربوه
!!!!!!!!!
اتخنقت من العيشه اللي عايشينها صحابي المتجوزين والمرتبطين واللي بيحبو .. قلت لنفسي يا واد نفض للحياه واتفسح شويه في النت
.. لقيت في شعار رافعينه اخواتنا المدونات بيقول ايه
كلنا ليلى
!!! نعم
!!! لا بجد نعم
لما كلكم مهضومين كده .. امال احنا والفلقطه اللي فيها كل الولاد اللي اعرفهم دي ايه ؟؟
!!! هوايه مثلا
!!! حابين البهدله اللي عايشين فيها وغاوين شقلطه
!!! أكيد احنا برضه ولاد آدم عندنا مشاكل بسبب بنات حوا
.. وبما ان بنات حوا بيقولو انهم كلهم مهضومين ومكسورين الجناح
فإحنا برضه فينا اللي مكفينا منهم .. ومعظم مشاكلنا في الحياه بسببهم .. ومش عايز حد يعترض من اخواننا ولاد آدم ويقول لأ انا الحياه معايا فل
لا يا حلو .. جايز دلوقتي معاك الحياه فل وبيس يا مان .. لكن اكيد في فتره خدت على قفاك بسبب واحده من بنات حوا .. وأكيد هتاخد على قفاك تاني في المستقبل
.. وبالتالي احب اقول
.. اخواني ولاد آدم
كلنا هذا الرجل .. نعم يا رجال الغد .. كلنا مُفلقط ويبكي على جرحه .. ومن حقنا كرجال ان نقولها وبكل قوه .. نقولها وبكل صدق .. نقولها وبكل صراحه .. نقولها مدوية في الافق
!!!!! كلنا متبهدل .. كلنا متفلقط .. كلنا متشحور .. كلنا .. كلنا .. فوزي
!! أي نعم .. كلنا .. فوزي

ولأننا رجال شيك ومعروفين باحترام الإتيكيت .. وعارفين المقولة الجريجي اللي بتقول ليديز فرست .. يعني الستات في أول الميكروباظ .. هنعلن يوم (كلنا فوزي) بعد يوم (كلنا ليلى) الموافق تسعتاشر اكتوبر من كل عام
وليكن يومنا يا معشر الرجال .. يوم الواحد والعشرين من اكتوبر من كل عام ميلادي
– عشان الهجري مافيهوش شهر اكتوبر بالنباهه كده -
.. لنجلس ونتسامر ونحكي عن معاناتنا وما عانيناه من بنات حوا
.. وليكن شعارنا منذ هاذوها اللحظه
الله .. الوطن .. فوزي
.. ولتكن قصة منا نحن بني آدم .. أمام قصة منهم بنات حوا
.. وفارس لفارس .. قصدي فارس لفارسه
.. والنت واسع

ملحوظه بخصوص فوزي والشعار بتاع الحمله
اللي صمم الشعار ده إحدى بنات حوا .. وده بيؤكد على صدق قضيتنا الانسانيه .. ومدى المعاناة اللي بنعيشها .. واعترافهم الضمني بده
وعلى فكره .. صاحب الصورة .. الشهيد فوزي عبعال .. روحه بترفرف علينا .. وبيقولنا
الى الأمام يا رداله .. الى الأمام يا ددعان .. الى الأمام يا ولود آدم :
ياترى .. حد جاي معايا ؟؟؟؟؟

صمت الجبال · #2 11-19-2008, 08:55 AM

هو في حاجه ؟؟؟
كنت مروح البيت وانا منشكح وزي الفل بعد ماشفت فيلم زي النهارده .. وانشكاحي زاد لما ركبت المترو ولقيت مكان لروحي عشان اقف بروقان .. وابص كده على يميني الاقي واد وبنت عمالين يبصو ناحيتي ويضحكو وكأنهم بيتريقو على البيريه اللي انا لابسه .. والواد كان من نوعية الشباب المتتامر اللي حاطط شعر على جِلّو .. قصدي حاطط جل على شعره وموقفه زي القنفد .. والبنت لابسه هدوم تكني كلر ومحزقه وملزقه .. وقال ايه لابسه حجاب ايراني عباره عن عدد اتنين كوفرتا صوف العسكري
في الاول قلت لروحي ياد كبر دماغك .. لكن لقيتهم عمالين يضحكو ويكركعو ضحك وبان قوي انهم بيتريقو علي .. قلت لأ بقى .. رحت متجه ناحيتهم .. وعلى فكره .. انا عمري ماكنت ضد ان واحد يحط جل على شعره ولا واحده تلبس حجاب ايراني ولا اسباني حتى .. لكن لما الحوارات تدخل في الدح .. يبقى ماحدش يقول أح
دخلت عالواد اللي اول ما شافني هو والبنت قلقو مني وكتمو ضحكهم
صمت الجبال: هو في حاجه ؟؟
الواد : - وهو بيداري ابتسامته وبيحط مكانها نظرة اللامبالاه - انت اللي في حاجه ؟؟
صمت الجبال : لأ اصل لقيتك انت واللي معاك عمالين تبصو ناحيتي وزي ماتكونو بتتريقو علي او حاجه كده
البنت : - وعينيها بتقول يكاد المريب يقول خذوني - وهنتريق عليك ليه يعني !!؟؟
صمت : مانا برضه قلت اجي واسألكم .. لو انتي شايفه في حاجه غلط .. قولي
الواد : لو احنا عايزين نقول حاجه هنقول .. ومش هنخاف
صمت : اه مانا عارف طبعا .. وعارف برضه انك لو هتتريق على البيريه اللي انا لابسه .. هتكلمني .. وانا ساعتها ممكن اتريق على شعرك اللي انت موقفه بجل كأنك قنفد متكهرب
!!!!! الواد : نعم
صمت : ومش بعيد كمان اتريق على حجاب الانسه اللي معاك .. واللي شكلها هربانه من قضية تار في الصعيد ومتلفحه بجلابية العمده وفاكراها حجاب
البنت : هو في حاجه ؟؟؟؟؟
صمت: لأ ابدا .. انتو في حاجه ؟؟؟؟
بعد ما قلت الكلمتين اللي قلتهم .. لقيت في كام واحد حوالي بيبصو وهم منشكحين قوي .. تقريبا انبسطو من اللي عملته .. وشكل الواد والبت كانو عمالين يتريقو ويضحكو على كل اللي في المترو

صمت الجبال · #3 11-19-2008, 08:59 AM

!! دبور و بوكسر .. ولنضه
من كام يوم كده كنت قاعد باشرب فيسكافيه في اوضتي وباتفسح عالنت وفاتح شباك الاوضه والحياة منجهه عالآخر .. واذ بي أُفاجأ .. بدبور راح داخل علي الاوضة .. واتجه فورا على اللنضه بتاعة الاوضه واللي كانت منوره .. وعمال يخبّط فيها
والحق اقول .. واقول الحق .. خفت شويه عشان احنا بنسمع ان الدبور لدغته والقبر .. قمت طافي شاشة الكومبوتر وفاصل الماوس عشان بينور .. ومشغل التكييف على اسقع درجة - وهقول ليه شغلّت التكييف على اسقع درجة - وغطيت نفسي بقميص مرمي على الارض جنبي – وبرضك هقول ليه القميص كان مرمي عالارض – ومسكت الماج بتاع الفيسكافيه في ايد .. وحطيت علبة السجاير والولاعه في جيب منطلون الترينك .. واتجهت على باب الاوضه ورحت فاتح الباب ومطفّي النور بتاع الاوضه وخارج .. وقفلت الباب ورايا
التوضيح : اللي جه في دماغي ان الدبور بما انه اتجه عاللنضه .. واللنضه سخنه .. يبقى بيحب الجو السخن .. وبناءا عليه رحت مشغل التكييف عشان الجو يبرّد والدبور يسقع ويسيب الاوضه .. ولأني فنان بوهيمي ومهندس ديكور لاوذعي .. فاللي يدخل اوضتي يلاقيني معتبر الدولاب ده شيء ثانوي .. وكل هدومي عالارض بتعمل لوحه سوريالية المعالم .. عشان كده القميص اللي اتغطيت بيه كان مرمي عالارض جنب المكتب
لما خرجت بره الاوضه ومعايا الفيسكافيه وعلبة السجاير .. قعدت أفكر شويه .. هو ايه اللي جاب الدبور للدور التاسع في العلالي .. أمّا دبور ناقص وعنده تطلع طبقي صحيح .. واساسا اساسا منطقتنا نضيفه .. الدبور ده جه ازاي .. هم مافيش غيرهم البوابين لما كترو في المنطقه وبقو بيزبّلو الدنيا .. قامت الدبابير كترت .. يلا انا مش هعمل عقلي بعقل بحتة دبور .. زمان الدبور خرج من الاوضة دلوقتي بعد مانا طفيت النور وشغلت التكييف .. انا هدخل الاوضه بقى واكمل فسحتي عالنت ومش هاسمح لحتة دبور انه يعكنن مزاجي .. بس قبل ما ادخل الاوضه .. هاجيب علبة مبيد حشرات عشان بعد مايخرج الدبور ارش الاوضه .. يقوم يحرّم أي دبور لطخ يمكن أن تسوّل له نفسه المريضه .. ان يدخل غرفتي السورياليه .. ويعمل راسه براس اسياده البني آدمين
جبت علبة مبيد الحشرات .. واتضح انها علبة مبيد حشرات زاحفه وصراصير .. لكن مش مشكله .. الدبور عباره عن صرصار بس طلعله جناحات ودهن نفسه اصفر في اسود .. وده تقريبا لأنه كان عايز يشتغل تاكس في اسكندريه
دخلت الاوضه وكلّي حذر وحِيطه – يالهوي على كلمة حِيطه دي .. طب والله تعبت عشان اجيبها – وولعت اللنضه .. بصيت على الاوضة كويس .. مافيش أي حاجه والحمدلله .. رحت عالمكتب وقفلت التكييف اللي تلّج الاوضة وقلبها فريزر .. وشغلت شاشة الكومبوتر ووصلّت الماوس .. ولسه هكتب عالكيبورد .. لقيت الدبور راح خارج من تحت المكتب
يالهوي .. ده دبور غتت قوي .. يعني اضافة على انه ماعندوش أي احساس وشكله لاقط على حلاليفي وما حسش بالسقعه .. اتضح انه غتت وغبي كمان .. لكن لأ بقى
المره دي انا مش هخرج بره الاوضه واسبلو الجمل بما حمل .. دي أوضتي .. وهو اللي لازم يخرج منها
وعنها .. ورحت ماسك بوكسر كان مرمي عالارض – راجع التوضيح اللي بقول فيه ان هدومي مرميه عالارض وعامله لوحة سورياليه – وحادف البوكسر على الدبور .. قام عمل زي الشبكه اللي بيرميها الصياد على القرد اللي بيتكلم .. لما بيصطادوه من أدغال شومبونجو .. وراح واقع على الارض .. والدبور محبوس ومزنوق بين ثنايا وطَيّات البوكسر
- علي النعمة أنا حلو قوي في اللغة العربية الفصحى .. ثنايا وطَيّات .. وحِيطه -
ورحت جايب علبة مبيد الصراصير وقاعد ارش عالبوكسر عشان الريحة تتغلل جوا الانسجه وتخنق الدبور .. وارش ارش ارش .. لغاية ما المبيد خلص خالص .. قمت شايل البوكسر .. وبصيت عالدبور لقيته لسه في الرمق .. قمت جايب علبة بادي سبراي وقلت اهو كللو رش برضك .. وقعدت ارش ارش ارش .. لقيت الدبور بيرفعلي رجليه وجناحاته .. وتقريبا بيقولي حط شويه هنا كمان .. قلت لأ بقى .. طب علبة المبيد وكده كده مالهاش لازمه قوي .. انما البادي سبراي لأ .. كللو إلا العطر يافتى
ورحت جايب علبة سجاير كولوباطرا بوكس كانت فاضيه .. وبـ حتة ورقة شلت الدبور وحطيته جوا العلبه الفاضيه .. وقعدت أرج في العلبه .. واسمع الدبور بيتخبط وبيترزع جواها .. أرج وهو يتخبط ويرزع .. ويستغيث .. انا أرج وهو يستغيث .. أرج ويستغيث .. لكن أبدا .. أنا قاسي جدا .. ولا يونكن أبدا أرحمه .. فين وفين .. لغاية ما الدبور سكت .. والسر الإلهي طلع
طبعا بعد ما ريحة البوكسر كلها بقى مبيد حشرات .. قررت إني أرميه في الزباله وقلت مش مشكله .. واساسا اساسا .. طلع ولا نزل .. حتة بوكسر .. يعني مش حاجه كبيره
وآدي صورة الدبور .. لكي يكون عبره لغيره من الدبابير التي تسوّل لهم أنفسهم المريضة على الدخول في أوضتي .. والتخبيط في لنضتي

وبناءا عليه .. أحب أوجه نصيحة لكل شاب وكل فيتاء .. لو جالكم دبور وقعد في أوضتكم بالعافيه .. إياكم تسكتوله .. ادولو على نافوخه .. أوعو يصعب عليك .. مايصعبش عليكم بوكسر

صمت الجبال · #4 11-19-2008, 09:17 AM

حوار مع نفسى وانا قاعد على قهوة المصريين

قررت اني ابقى انا مش انا.. أسيب نفسي تحت و اطلع أبص عليها من فوق.. بتعمل ايه في حياتك ياللي اسمك صمت الجبال ؟ ايه بتعمليو يوافق هوى نفسك و ايه بتعمليوعشان لازم تعمليو؟ و ايه اللي وصلك انك ممكن تفضل شهور تعمل الحاجة اللي حاسس انك عايز تعملها بس؟ و مين قاللك ان الحياة هاتمشي على طول كده؟ ايه؟ اتفاجئت ما جبت عربية و ابتديت تسوق و لقيت نفسك كاره السواقة بس لازم تسوق؟ خضتك اوي كلمة لازم؟ مش متعود انك تبقي ملتزم بحاجة أو مسئول مسئولية كاملة عن حاجة؟ عشان كده بأه معظم وقتك اللي بعد الشغل بتتعمد انك تقضيه على قهوة المصريين و في الحاجة اللي انت عايز تقضيه فيها و بس؟ فين يا استاذ القراءة في يومك؟ فين الكتب اللي شلتيها على قلبك من معرض الكتاب أول السنة دي؟ آدي معرض الكتاب قرب و انتي يا فالح قريت كام صفحة من كل كتاب و ركنتهم .. فين الوقت اللي المفروض يكون لربك؟ آه طبعا هاتقولي ان كل الأعمال الخيرية اللي انت مطحون فيهم دول لوجه الله.. ماشي ما اختلفناش، بس عايز تفهمنى انك كل مرة بتعمل حاجة للجهات الخيرية دي بتجددي نيتك لله؟ و لا فيه منهم بتنزل عشان الدنيا حلوة مع الناس دي؟ ايه؟ كلامي قاسي؟ معلش، بس لازم كل شئ يبقى محدد عشان نعرف هانروح فين و هانمشي من أنهي سكة.. ماهو لازم يكون فيه سكة ما ينفعش نمشي في طريق مش عارفين آخرته ايه.. ما ينفعش نعيش اليوم بيومه.. ما ينفعش حال أيامنا يبقى زي حال السواقة في القاهرة، عبارة عن ملء فراغات و خلاص.
إيه خلصت كلامك؟ طبعا الكلام عمره ما هايخلص بس متهيألي خلص وقت الكلام و جه وقت الفعل.. ابدأي قول لنفسك لأ.. لأ لصغائر الملهيات عن الأهداف.. عشان كده ابدأي يا استاز حط لنفسك أهداف.. إلزم نفسك بمسؤوليات و كون أدها.. جدد نيتك في عمل الخير و أوعي يتحول لعادة.. إخلق وقت للقراية و لورد القرآن كل يوم.. هاتجيب وقت منين معرفش، بس اتصرف و نظم نفسك و حياتك و ارجع صمت الجبال بتاع 3 سنين فاتوا.. و لا الغربال الجديد له شدة يا أستاذ؟
خلص كلامي مع نفسي.. يا رب يعيني أكون حد تاني غيري.. مش عاجباني خالص السنة اللي عدت دي.. حتى و لو سني لسه مش 70 سنة.. برضه مافيش وقت كتير فاضل عشان نضيع سنة من عمرنا من غير ما نلاقي نفسنا حققنا حاجة أو بقينا أحسن.. هو العمر فيه كام سنة؟

والى اللقاء مع يوم جديد

~~crime~~ · #5 11-19-2008, 09:20 AM

يا عم يا بتاع الدبور انت لو كنت دست عليه وريحت نفسك بدل فيلم توك كروز مهمه صعبه الجزء 4 اللى انت عملته ده

صمت الجبال · #6 11-19-2008, 09:52 AM

النهاردة هحكى ليكم موقف حصل ليا وانا راكب المترو يا اخواني

نبتدي
بعد ما خلصت سهرتى مع اصحابى على قهوة المصريين
قمت علشان اروح البيت ورحت محطة المترو
قعدت في المترو من اول الخط طبعا علشان انا ساكن في بعيد والحمد لله عرفت اظبط نفسي اني مقعش في غلطة عربية الستات دي وبقعد في عربية الرجاله على طول
المهم قاعد وفرحان بالموبايل بتاعي علشان عليه شوية برامج جديده والعاب بقى وفرحان بيهم زي اي محدث نعمه عادي يعني – الله يسامحك يا اسمك اية000 دة واحد صاحبى انت اللي نصحتني بالموبايل الثري جي – المهم يعني قاعد بلعب في حالي وماليش دعوه بحد والمترو رايق لسه, وشويه الدنيا بدأت تتزحم وجه واحد وقف قدامي وتقريبا هو واقف فوق مني شويه شويه وهيدوس على دماغي
المهم طبعا انا بصيت لقيته مش راجل كبير ولا حاجه بس هو تقريبا عايز يتفرج على الموبايل ويمكن انا ازهق فياخد الكرسي عملت فيها عبيط طبعا وسبته واقف على رجلي براحته ,

لحد هنا وعادي الموقف بيحصل كتير وانا مشغول في الموبايل حد وقف جنبه وراح حاطط شنطته جنب مني على الرف اللي جنبي مأخدتش في بالي بصراحه ومبصتش هو مين اصلا ,

وبعد شويه الراجل اللي انا مكنتش شايفه ده بدل مكانه مع اخينا الغتيت اللي راكن فوق مني علشان يسند ظهره بصراحه كنت سرحان فمخدتش بالي ان المفروض اني اقومله لأنه فعلا راجل كبير شويه في السن وعادي يعني انا لما بلاقي حد كبير بقومله من نفسي من غير طلب منه او من غيره بس الشاب اللي جنبي فجأه اخدته الحماسه وقام وقعده لحد كده والموقف عادي خالص وانا مش مدي اهتمام هو صحيح سبقني للثواب بس برده هو فضل سايبه واقف قدامه كتير وانا مكنتش واخد بالي المهم بعد ما الراجل قعد شكره على معروفه والتاني يقوله لا يا حاج ده حقك اصلا ومكانك التاني يقوله الله يكرمك يا ابني وبعدين فهمت ان الكلام يقصدوني انا بيه على اساس اني تنح كبير وازاي مقمتش انا للراجل الكبير وان الشاب التاني قام مضطر لما لقى ان انا مفيش مني فايده مبقتش فاهم بصراحه هو ايه الفرق لو قام هو او قمت انا المهم حد قام وبعدين هو كان واقف قدامه هو يعني هو اقرب واحد منه المهم انا طبعا سمعتهم وعملت عبيط , ده يقوله اصل الناس معرفش جرالها ايه وده يقوله معلش يا ابني يمكن تعبان ولا حاجه
سكت وقلت يا واد طنش خااالص
يقوله اصل الزوق ومعرفش ايه وبعدين حسيت الكلام هيبتدوا يلبخوا بس قبل ما اتكلم اتلفتلي الراجل الكبير وقالي "مش يمكن تعبان هو مش انت تعبان برده وراجع من الشغل تعبان"

بصيتله وقلتله" الحمد لله على كل حال"
راحوا باصينلي باستغراب وقالي الراجل الكبير" انت بتشتغل ايه يا ابني "
حسيت في نبرة صوته كده انه عايز يقيمني كده ويعرف انا ايه في البلد دي يعني
رديت بهدووووووء " على باب الله "
ابتسم وقالي "لا بجد بتشتغل ايه؟"
كررتها تاني " على باب الله "
قالي" طيب انت خريج ايه ولا دي كمان على باب الله"

ابتسمت غصب عني وقلتله " على باب الله "
"يا سلام هو كله عندك كده انا عايز اتعرف بيك يا اخي ولا فيها حاجه دي"
"طيب اسمك ايه يا سيدي"
قلتله "واسمي يفيدك في ايه ولا شغلي يفيدك في ايه"
قالي" انا بس عايز اعرفك يمكن اقدر اخدمك بحاجه انت اصلك مش عارفني انا مين"
ان ان ان ان ااااااااااااه تششششششش

صمت الجبال · #7 11-19-2008, 01:18 PM

وانا قاعد على قهوة المصريين امبارح بليل سمعت طرطيش كلام كدة بين اتنين زباين ال بيقولو اية

أن فيه حملة لمكافحة التدخين وحملة كمان لمكافحة المخدرات

بس بقى اللي عمري ما شفته ولا سمعته هو

حملة لمكافحة الشباب الفاشلين في مصر

وبث الأمل في نفوسهم للحياة من جديد

وبقصد بكلامي كل شاب مات جواه الأمل

وفقد كمان الثقة في نفسه وفي اللي حواليه كمان

وأصبح مفيش قدامه إلا حاجتين

الأولي هي القاعدة على القهاوي

والتانية بقى إنه يدور على المخدرات والهلس بأي شكل

بس بقى يا غلابة مفيش معاهم اللي يقعدهم على القهوة

ولا فيه معاهم كمان اللي يشتروا بيه مخدرات

طيب وإيه العمل بقى دلوقتي ؟؟؟؟

قالوا مجموعة منهم إحنا نسرق علشان نظبط الدنيا

وقالوا مجموعة تانية إحنا نقضيها أي حاجة في أي حاجة وأهو اسمنا شغالين

وفي الحالتين المهم أنهم يجيبوا الفلوس اللي تخليهم يقضوا يومهم

ويجيبوا مخدراتهم كمان

المجموعة الأولي كده كده مصيرهم السجن لأن ده جزاتهم

ومش لازم يحسوا بالحياة الكريمة من الأصل

لأنهم عمرهم ما حسوا بالنعمة اللي هما فيها

أما بقى بالنسبة للمجموعة التانية

لما تيجي تسأل أي حد فيهم عن حاله

يرد ويقولك أنا شغال شغلانة مؤقتة كده لحد لما أظبط نفسي وألاقي شغل دائم

طيب بقى يا عم الأمور منك له .. له .. له .. فين

حياتك ........... وفين كمان

مستقبلك .............. وفين كمان

طموحك ................ وفين كمان

العيشة الكريمة اللي بتتمناها

فين بقى كل ده

يرد عليك ويقولك ما هو ظروف البلد كده

وأنا أعمل إيه مش لاقي شغل خالص

هههههههههههههههههههههههههههههه

والنبي بقى ده كلام يطلع من شاب طموح أو عايز يبقى حاجة

أكيد أكيد من الفاشلين طبعاً

فاكرني كده خلصت كلامي ؟؟؟؟

أنا كده خلصت ............................... لا لسه شوية

تلاقي الواحد من دول كمان يأخد ناس تانية معاه

ناس مش دي حياتهم ولا ده كيانهم ولا دي كمان تربيتهم

ويجروهم لسكة الفشل علشان يبقوا زيهم من كل إتجاه

وعلى سبيل المثال طبعاً

يقولوا يلا بينا بقى نقضيها ونسهر سهرة حلوة ونضرب سيجارتين كمان

أو يا مزاجه بقى لو إزازتين بيرة معاهم علشان نعيش الحياة ونتعامل

ودي البداية بس

والتاني المغفل كمان يروح معاه في نفس التيار ويطاوعه في كل اللي يقوله

ولا كأن عنده دماغ .............مجرد آلة بس تنفذ اللي بيتقال

مش كده وبس ده كمان بيبرر لنفسه إن اللي بيعمله ده مش غلط

لأن ظروفه مخبطة شوية اليومين دول وتعبان في شغله

أو تعبان أنه بيدور على شغل

أو تعبان لأن عنده شوية مشاكل في البيت أو شوية مشاكل مع خطيبته

وفي كمان بعض منهم يتحجج ويقولك أصل نفسيتي تعبانة اليومين دول

والنبي ده كلام

أما صاحبنا التاني بقى فمصدق

أهو واحد يشاركه في فساده وفي حياته الفاشلة

تقول إيه بقى ولا تعمل إيه ؟؟

وغيره من ده كتير ولو أنا كملت كلامي يبقى هكتب للصبح

المشكلة بقت مشكلة شباب كتير أوي مش واحد ولا اتنين

ولووقفنا محلك سر كده يبقى بقى عليه العوض في بقيت الشباب

كل ده بقى بسبب

إن أهالينا الله يكون في عونهم هيلاحقوا على إيه ولا إيه

المشكلة فينا إحنا ومن جوانا مش من أهالينا أو البيئة المحيطة بأي حد فينا

المشكلة بقى في

إننا مهتمين بحاجات كتيرة إهتمام فوق الوصف

وممكن الحاجات دي تكون بسيطة جداً أو تافهة كمان

ولكن على الجانب التاني

مهملين جداً في حاجات تانية إهمال جسيم

مع إن ممكن الحاجات دي تبقى أهم كتير من الحاجات التانية

مش بس كده لا وليها الأولوية كمان في تنفيذها أو حلها

وكل ده بسبب إننا مش حاسين بحجم المشاكل اللي حوالينا أد إيه ؟؟؟

أو إهمالنا لبعض الحاجات ممكن توصلنا لفين ؟؟؟

محتاجين وعي للشباب الفاشل علشان يبدأ يحلم من جديد

وكمان وعي للشباب الواعي علشان ينضج ويكبر وده شيء أكيد

معلش بقى أنا طولت في كلامي شوية

صمت الجبال · #8 11-19-2008, 01:37 PM

انا بشوف

على قهوة المصريين الخريجين بيتجمعوا

بيجمعوا الافكار

والذكريات

والاراء

ده طبعا عشان معظم الخريجين معندهمش لا شغله ولا شغلانه و حتي اللي شغالين برده بيقعدوا علي القهوه

يتكلموا في مواضيع كتيره ويحكوا علي اللي حصل معاهم طول اليوم ولا حتي اللي حصل في الماتش بتاع أول إمبارح

ده حتي اللي في الكليات برده قاعدين علي القهوه

القهوه مكان بيلم الشباب وبصوره واضحه أوي ولو هيضايقكم كلمه قهوه نقول كافيه اللي البنات كمان بقت تقعد عليها وظاهره برده

منتشره جدا وغريبه جدا

واحنا عايزين نحي قهوة المصريين هنعمل ايه هنحكي ونتكلم ونفضفض من القلب
لانها القهوة الوحيدة الى
ممكن تحس انك قاعد فى بيتك بلظبط

صحصح معايا يا حج

ننده ونقول

يا خريج ...بتشتغل ايه ؟؟

يا خريج .. مشتغلنش ليه ؟؟

يا خريج .. ايه اخبار شغلك ؟؟

يا خريج .. طور نفسك وانت بتشتغل؟؟

يا خريج ..بكرة تطلع معاش

يا خريج أحكي لنا علي اللي قلبك

وأنت يلي لسه في الجامعه وما اتخرجتش تعالى يمكن تستفيد من الناس اللي اتخرجت وتعرف

اللي بيحصل في الدنيا بتاع الخريجين وقلنا رأيك في كلامهم وأستفاد منهم

رش يا بني الميه وروق القعده في ناس من مش فاكر جايه تقعد وحضر القهوه المظبوطه عشان نظبط الدماغ

صمت الجبال · #9 11-19-2008, 02:21 PM

دخلت أنا وصديقى الانتيم على القهوة المصريين وهو المكان الوحيد الى بعرف اخد رحتى فى بس هو مكان مزدحم جدا لا تسمع فيه إلا صوت الراديو أو التليفزيون ومناقشات بصوت شديد الارتفاع ، ضحكات نكات قفشات موضيع وحورات بحق وحقيقى " كلام عن الموبيلات ويا سلام بقى لو نقاش عن الكورة
تسمع احلى تعليقات واركان كتير ومتميزة واول ما تدخل تسمع الجملة المشهورة من العمدة صاحب القهوة واحد شاى على ميه بيضا " .
بحثت عن مكان نقعد فيه أنا وصديقى بعيد عن زحام الشارع وحركة السيارات المسرعة بجوار الرصيف ، قابلنى عامل القهوة بالترحاب .. اتفضل يا باشا .. طبعا كلمة يا باشا دى للى بيدفع بقشيش اى بقشيش المهم يدفع .. ماشى يا " عصفور " نجلس فين .. عصفور ده اسمه اطلق عليه من سرعة تلبيته للطلبات .
جلست وصديقى فى احد اركان القهوة أو كما يحب ان يسميها صاحبها " كافيتريا " المهم اننا ونحمد الله قد عثرنا على هذا المكان . وهو ركن خف تعوم من غير هدوم اسم للذيذ مش كدة فالقهاوى هى النادى الاجتماعى للغلابة وانتم عارفين اننى لا أملك اشتراك نادى اجتماعى . ما علينا متفكرونيش . جلست وبدأت عينى تلف ارجاء المكان ويدى ترتفع تلقائيا لإلقاء التحية على الرواد المنتظمين المواظبين على التواجد فى هذه المواعيد من اليوم .
تشربوا ايه ؟ ولا زى كل يوم ؟... دى كلمات عصفور لازم يقولها واحنا لازم نقوله " زى كل يوم " فينظر إلينا وفى نفسه يقول ما تغيروا . فكيف لنا التغيير هو اللى معانا على قد كباية الشاى وحجرين المعسل . المهم نبدأ بالتعايش مع جو القهوة وذلك بالتركيز على ما يقوله الراديو من أخبار أو اغانى وهناك من ينادى ويطلب اغلاقه لفتح التليفزيون . وامسكت الجريدة الموجودة على تراتبيزة جارى ... لو سمحت فأومئ لى برأسه بالموافقة . وحتى لو مسمحش فهى خلاص معى وبدأت اتصفح الصفحة الاولى وانت عارفين فيها ايه طبعا " اكاذيب ووعود وضحك على الدقون " وانجازات ووصايا وتوجيهات ومنفذين للتوجيهات مش عارفين هم بيعملوا ايه المهم يقولوا احنا عملنا حسب التوجيهات .
تلمع يا استاذ .... البية البوهيجى بيقولى المع ولمواخذه الجزمة ، طبعا ودن من طين وودن من عجين وهو مش عاوز يمشى إلا لما اقول لسيادته ماشى أو شكرا وعشان انا عارف رخامته صحت فيه يا عم انا بلمعها فى البيت خلاص يا سيدى . ورجعت لصفحات الجريدة احاول الاقى خبر يفرحنا انا وصديقى . مافيش فايده جائنى صوت صديقى ، ياعم اسمع الكلام مافيش فايدة . ليه التشاؤم ده يا اخى كل جملة على لسانك تسبقها بكلمة مافيش فايدة ...!!! أنت شايف احنا اهو عملنا ايه ... وده كلام صديقى .. ، أحنا بقالنــ ..................
بدأت أبحر فى الجريده واغوص اكثر حتى تنغمس رأسى وأذناى بين أوراقها وكلماتها التى ليس بها مفيد حتى يخف صديقى من حديثه اليومى عن احوالنا واحوال البلد واللى بيحصل فيها واللى بيحصل لينا ...... زمان كان الكلام ده يقال فى التجمعات الشبابية والوطنية وكانت الناس بتسمع وتستجيب والآن ما بيدنا إلا الجلوس على القهاوى والتنفيس عما بداخلنا ... وأقول لكم الحق انا مبرضاش حتى اقول اللى فى قلبى لانه فى الأخر
عندى امل فى بكرة
اة نسيت ادفع الحساب يا عصفور تعالى خد البقشيش

صمت الجبال · #10 11-19-2008, 03:14 PM

دخلت على قهوه المصريين لقيت الناس كلها بتبص فى مكان واحد على التلفزيون قولت يسلام ايه اللى لافت انتباهم اوى كده.قلت ابص بصيت لقيتهم بيبصوا على المصارعه ...والناس بقى منفعله واللى بيكسر فى التربيزه اللى قدامه.واللى عاوز يضرب اللى جانبه.واللى بيعض فى صوابعه .واللى بينادى على المصارع ويقوله قوم اضربه يا كذا ماتقولوش يعنى اخوه اللى بيلعب فى التلفزيون...واللى مش عاجباه المصارعه ومالهوش فيها قاعد بيعدل دماغه بكام سيجارة بانجوا او كام حجر حشيش ...واللى بيلعب طاوله ...كله فى ملكوت لوحده...
وانا قاعد فى حالى شفت المنظر دة اسيبكم بقى مع الحوار برحتكم
الاستاز اسامة والحاج حلمى
واحد شكلة كدة راجل ذو مركز رح دخل على راجل تانى فى ركن لوحدة قاعد واخر سلطنة وبقول السلام عليكم ياحاج...لقيته بيبصلى وماردش على ...ولقيته من غير مقدمات بيقولى انا ربنا تاب على وماشى سليم دلوقتى...قولت له انت بتقول ايه ياعم الحاج هو انت مفكرنا ايه...لقيته بيقول لى مش انتم بتوع برنامج خلف الاسوار ...ضحكت وقولت له لا ياحاج ماتخافش .احنا منكم وزيكم .احنا برنامج (حكاوي على القهاوي).قالى اه طيب فين مدام ساميه الاتربى.قولت له ياحاج تعيش انت .انا بكمل البرنامج بدل منها.قالى طيب .قولت له بقى ممكن تخلينا نسجل معاك .قالى يسلام اوى اوى .اتفضلوا اقعدوا...

جاب لي كرسى وقعدت والمصورين جاهزين وكله تمام ...ونادى على صبى القهوه وقاله(ياواد ياعصفور انت ياواد.هات شاى وشيشه)وبعدين سالنى عاوزها بقى (عاديه ولا مغمسه)قولتلوا نعم انت بتقول ايه.قولتله ياحاج انا مابشربش شيشه اصلا. بصلى بصه حسسنى انى عيل علشان مابشربش شيشه مغمسه...قولت له خلينا فى الشغل...قالى ماشى يااستاذ...اتفضل...وبدا التسجيل ...انا المحاور(الاستاذ أسامه)ومع ضيف الحلقه(الحاج حلمى)

(الاستاذ اسامه)بعد السلام يحلى الكلام.سواء كلام محبه او خصام.دنيا فيها ناس بتصحى وناس بتنام.لكن على القهوه كله صاحى بانتظام .بيحكوا ويسهروا بانتقام .واذا سالت حد بتعمل كده ليه .يقولك ياسيدى دى شوية حكاوي على القهاوي....
(الاستاذ اسامه)نتعرف بحضرتك؟
(الحاج حلمى)اسمى حلمى
(الاستاذ اسامه)بتشتغل ايه ياعم ياحاج حلمى؟
(الحاج حلمى)بشتغل عربجىولنوضح لساده المشاهدين عربجى يعنى(بينقل اغراض على عربيه باربع عجلات كوتش يجرها حمار )
(الاستاذ اسامه)انت اتعلمت ياحاج حلمى؟
(الحاج حلمى)اه طبعا معايا شهاده عليا انا اخدت الابتدائيه
(الاستاذ اسامه)وماكملتش تعليم ليه؟
(الحاج حلمى)انا كان لى 6 اخوات ابويا ماكنش عارف ياكلنا يبقى ازاى هايعلمنا .احمد ربنا ياستاذ انى اخدت الابتدائيه.وبعدين ابويا كان موظف غلبان فى مستشفى وانتى يااستاذ عارف المرتبات زى الزفت ماتنفعش تاكل عيش حاف حتى لو عايش لوحده...
(الاستاذ اسامه)انت بتشتغل الشغله دى من امتى؟
(الحاج حلمى)من يوم ماطلعت على الدنيا وبقى عندى 10 سنين وفى نفس السن اللى اى طفل بيحلم انه يلعب ويتعلم ويعيش عيشه حلوه نظيفه.تقدر تقول كده ياستاذ بشتغل وانا فى رابعه ابتدائى..
(الاستاذ اسامه)انت متزوج وعندك اولاد ياعم حلمى صح؟
(الحاج حلمى)اه متزوج حته مره ربنا يخليها يارب اسمها جملات وعندى فاضلة خيرك يااستاذ خمس عيال اسمهم حسن التوربينى وهشام سنجه وعبده خنزيره وسيد شفلحه وحماده شنكح...
(الاستاذ اسامه)ماشاء الله ربنا يخليهوملك ياحاج حلمى.
(الاستاذ اسامه)وبيتعلموا ولا بيشتغلوا؟
(الحاج حلمى)بتقول ايه يااستاذ احلى نكته سمعتها ضحكتى بيتعلموا ايه ياعم اللى اتعلموا عملوا ايه ولا اشتغلوا .تعرف ياستاذ انا معايا شيال حاصل على شهاده جامعيه على ماظن كده واخد كليه هندسه.ياباشا خلينا فى الشغل العيل يطلع يشتغل احسن له .الحكومه اعترفت بنفسها وعملت اعلانا ان الحكومه ماعندهاش وظايف كله يروح يشتغل فى القطاع للخاص...ربنا يستر ياباشا...
(الاستاذ اسامه)ياحاج حلمى ايه رايك فى البلد؟
(الحاج حلمى)الحاج حلمى سكت وخد نفس شيشه جامد وهو بينفخ الدخان فى وشى بصلى من فوق لتحت !!!ومره واحده لقيته بيقول لى (قرعه).
(الاستاذ اسامه)هى مين اللى قرعه؟
(الحاج حلمى)البلد يااستاذ هى اللى قرعه.
(الاستاذ اسامه)يعنى ايه ياحاج حلمى قرعه ؟
(الحاج حلمى)يعنى الناس اللى ماسكين البلد بينظفوها من كل حاجه حتى جيوبنا بيخلوها قرعه.
(الاستاذ اسامه)هما مين الناس دول ياعم حلمى اللى ماسكينها ممكن تقولنا عليهم؟
(الحاج حلمى)يسلام كل الناس عارفه ولاانت عاوزني يااستاذ اقول اسماؤهم واروح فى داهيه.يااستاذ انا عندى عيال وعاوز اربيهم .
(الاستاذ اسامه)يعنى انا اللى عاوز اروح فى داهيه والبرنامج يتشرد ويتقفل!!!
(الحاج حلمى)تعرف يااستاذ انت طيرت منى الحجرين اللى انا كنت ضاربهم .دماغى فصلت اول ماجيبت لى سيرة البلد.احنا مالنا ومال البلد خلينا عايشيين يااستاذ.مافيش احسن من انك تنسى وتطرمخ فيها وخلى دماغك فوق السحاب .وبعد كده تروح البيت تلاقى المره عامله اكل وترقص شويه وبعد كده يحلى الكلام والملاغيه...
(الاستاذ اسامه)يعنى ايه ياحاج حلمى الملاغيه؟
(الحاج حلمى)بصلى بس وماردش. وقالى يااستاذ انت مالك.دى حاجه خاصه بينى وبين مراتى...
(الاستاذ اسامه)اه فهمت معلش ياحاج حلمى...
(الحاج حلمى)تعرف يااستاذ انا شغال عربجى ومتعلم نص علام.بس فنان وبكتب اشعار وروايات وقصص للعربجيه اصدقائى...
(الاستاذ اسامه)يسلام بجد ياحاج حلمى!!!طيب سمعنا حاجه كده علشان نختم اللقاء بيها؟
(الحاج حلمى)بص بقى يااستاذ انا هاقولك قصيده عن البلد بقى ...وربنا يسامحنى...مع انى كنت حالف بالله انى ماجيبش سيرتها ولا اكلمها...بس يلا علشان خاطرك يااستاذ اسامه والناس اللى معاك وانتم ضيوف عندنا برده...اسمعوا ياجماعه...

&اكمنك قرعه&
اكمنك قرعه انا حبيتك والحب عذاب يخرب بيتك
انا بعت هدومى علشان خاطرك وسرقت من الناس واديتك
ياأم النيل الفراوله والحكومه البرقوق
ده انا من طلعتك بصبح خضار مسلوق
وعجبى!!!

(الاستاذ اسامه)الله عليك ياحاج حلمى.تسلم وتسلم القرعه لينا...ان كنت غاوي او كنت ناوي.تعالى واقعد على القهاوي.وهات شيشه لعمى حلمى ولفة بانجوا للمستكاوي.وعمى مرسى هات له كرسي واول مايجي يقعد أوام أوام شدوا الكراسي.شربنا حشيش وكمان مرطب .خلاص ياخوي خلاص نشطب

حد فيكم فهم حاجة

صمت الجبال · #11 11-19-2008, 11:16 PM

يوم جديد

مثل اى يوم من ايامنا العاديه يمضى علينا وعليهم ايضاً..لا اعلم هل نحن لا نراهم او نغمض اعيننا عنهم لا اعلم.. لكن ما رأيته اليوم كان واقع من وقائع مجتمعنا المصرى.......
خرجت اليوم لكى استخرج اوراق من مصلحه حكوميه وكالمعتاد "فوت علينا بكره" تحولت معى الى "فوت بعد ساعه" وقد كنت فى مكان غريب تماما وسألت احد الماره فى الشارع"كوبرى القبه" عن اقرب كافيه قال لى"فى واحد فى آخر الشارع" ذهبت ووجدت الكافيه "قهوه بلدى"!!
اسمها قهوة المصريين
نظرت حولى لأجد منطقه شعبيه ليس لأول مره اراها ولكن لأول مره امعن النظر فيها..رأيت بساطه المكان وبساطه الماره وبساطه زبائن هذه القهوه...نظرت حولى لأتعرف على معالم المكان
وكنت قد اخذت جريده عين من معى وبدأت فى قرأتها..وقاطعنى صوت شاب!."آآمرينى يا استاذ" فقولت له"فنجان قهوه لو سمحت"
فذهب لزبون أخر ونظرت لاجد شاب آخر يقوم باعداد الشيشه لآحد الزبائن وهو يغنى مع انغام المذياع وآتى الشاب الاول مع فنجان القهوه وعندما وضعه بادرته بسؤالى؟
"ما اسمك:محمود الشرقاوىكم عمرك: 35 سنه .وكمان معايا بكالوريوس تجاره"
فنظرت له بدهشه قائله! ما سبب اختيارك لهذه المهنه فرد قائلا "مفيش غيرها" واستكمل كلامه قائلا " لوعليا ابقا وزير"
ضحكت وقولت هل تحب هذه المهنه فرد قائلا"مبحبهاش" وبالرغم من ذلك اعمل بها منذ عام واكمل كلامه ضاحكا: واخيرأ حققت حلمى واصبحت"مدير للقهوه دى" .
بعد مرور دقيقه رجلا يقول "الشيشه" فوجدت صبى قهوجى يأتى مهرولاً نحو

الرجل ليبدل له الفحم وبعدما انتهى من اعدادها ذهبت اليه وسألته ما اسمك:ايهاب وعمرك 18 سنه .لماذا تعمل فى هذه المهنه رد قائلا "مفيش غيرها". هل انت متعلم"لأ متعلمتش " واستكمل" ولا دخلت مدارس وبشتغل هنا من شهر"
وسالته لماذا لم تتعلم فقال باللهجه الشعبيه المعروفه "يا استاذ انا بشتغل هنا عشان اكل هو انت مش عايش هنا والا ايه يعنى الى اتعلموا عملوا ايه بالعلام" واكمل قائلا "تأمر نى بحاجه تانيه" فقولت له شكراً
وكل ما قاله كان يدور ببالى!!
هل كلامه صحيح ؟فى هذه اللحظه ادركت فعلا ما وصل اليه واقعنا من ازمات اقتصاديه وربما نفسيه واثناء تفكيرى لاحظت شاب ثالت داخل القهوه يحمل طاوله عليها كوبان من الشاى وكوب ماء الى المنضده المجاوره لى والتى يجلس عليها رجلان يقتربان من الخمسين يتهامسان احيانا ويضحكان احياناً و يتقاسمان الحديث فى مشاكل الحياه وهمومها
وضع الشاب الثالث الشاى والماء فاقتربت منه قائله ما اسمك: رد قائلا"احمد المنسى"ً .عمرك: 27 سنه
هل انت متعلم: نعم حاصل على ليسانس آداب قسم فلسفه!
لم اندهش لانه لم يكن الاول ولا الاخير ايضاً.فسألته لماذا اخترت هذه المهنه : "انا اشتغلت حاجات كتير اشتغلت محاسب ومندوب مبيعات بس اهى الظروف"
فسالته لماذه هذه المهنه بالتحديد فرد قائلا: "يا استاذ دى اكتر مهنه بتجيب فلوس"
ولا اعلم لماذا فى هذا الوقت فكرت فى اسمه "المنسى" وخطر ببالى ان كل شاب فى بلدنا "منسى". وسؤالى هو.. من هو المسئول عن حال كل "منسى" فى بلدنا.
ولماذا يتحمل الشباب معاناه التعليم ليكون فى النهايه "منسياً"؟!..
ملحوظه:
فى ذلك اليوم لم يخطر ببالى اننى سوف اقابل هذه الشخصيات ولم يخطر ببالى ايضا اننى سوف اجرى معهم حديث اعبر فيه عن رأيهم وآرآئهم ومعاناتهم ولكن كل شىء حدث بالصدفه فادركت وقتها ان "رب صدفه خيرا من الف ميعاد".

صمت الجبال · #12 11-19-2008, 11:45 PM

يوم جديد

قمت النهارده الصبح بدرى ورحت السجل المدنى علشان أطلع بدل فاقد للرقم القومى ، ولما رحت وقدمت الإستمارة الموظفة قالتلى دى بتاريخ قديم ما ينفعش، يهديكى يرضيكى مافيش ، قلتلها طب يعنى سيادتك هى الإستمارة إية مشكلتها ؟؟ قالتلى إنها بتاريخ قديم؟؟ و إنها كدا مش متأكده إذا كنت لسة مقيد فى الكلية ولا لا لان التاريخ اللى فى الإستمارة من السنة اللى فاتت ، وأصل الحكاية إن أنا بطاقتى ضاعت ورحت عملت إستمار جديده وبعد كدا لقيتها فركنت الإستمارة وضاعت تانى البطاقة فإستخدمت الإستمارة ، ومن هنا لهنا قالتلى لازم أجيب ورقة تثبت إنى لسة مقيد فى الكلية !! يا للهوى ، هسافر كل المسافة دى علشان أجيب ورقه تثبت انى مقيد مع إن البطاقة أساسا بدل فائد ، أحا يعنى ، وريتها الكرنية بتاع الكلية، قبلتة عن كره وقالتلى روح صورة ، رحت صورته وجيت ، حلو؟ لا مش حلو ، بصت على ختم النسر كدا ، وبعين خبيرة ، خبيرة خبيرة يعنى وبعدين قامت مطلعه عدسة مكبرة وقعدت تبص على الختم ، تبص على الختم ، وهووووووووب ،وبصوت عالى قالت ” يا أم أحمااااااااااااااااااااااد” ثوانى وكانت أم أحمد واقفة قدامنا قامت قالتلها “والنبى شوفى كدا الختم دا باين ولا لا” وأم أحمد يبدو من شكلها إنها أكثر خبره ، أخدت منها العدسة المكبرة وبصت كدا على ختم النسر وقال ” لالا مش باين خالص” يا نهار إسود ، إية الهبل ، دانا وقعت فى سجل مدنى بتاع مجانين ولا إية ، ختم النسر باين أهو ، قلتلها بنرفزة “ماهو باين أهو مكتوب وزارة التعليم العالى ، دا حتى ختمين مش ختم واحد ، وبعدين دا بدل فاقد يا مدام ، مش محتاج ختم أساسا ، ما البيانات كلها عندكو ” وبعدين شورتلها على النسر وبعصبية قلتلها ” بصى بس هو باين أهو … نسر دا ولا مش نسر؟ نسر أهو ” قالتلى ما ينفعش وسابتنى ومشيت ، وخلتنى قعدت أبص كدا على النسر وأنا مرتاب فية الكارثة بقى فين ؟؟ إن موقع الحكومة المصرية أساسا بيطلع بدل فاقد من غير ختم ولا إستمارة ولا أى بطيخ
بعديها رحت مع والدى للعربية اللى بيتعملها عمرة ، لاقينا السمكرة زفت ، علمنا على الأماكن اللى عايزة تتسمكر من تانى ، ورجعنا للسمكرى أول ماشفها شخط فى فينا وقال ” مين اللى عمل العلمات دى ؟؟ ” وهاج وماج وإزاى حد يعدل على شغلة ، وإدايق أوى لانه متخيل إن المكنيكى هو اللى بيعدل على شغلة نرفزنى وشديت معاه ، وأبويا يهدينى وأنا لا ممكن ، مع أنه أساسا ماعندوش ضمير ومسلم العربية زفت فى السمكره ودا كلة و متنرفز ، يعنى المفروض أخد العربية بعيبها وأمشى ولا إية يعنى؟ دى حاجه تخنق
رجعت البيت خلصان وعطشان جدا فتحت النت لقيت الأغرب ، أخبار كتير أوى غريبة
بيقولك طنطاوى بيقول”نحمد الله تعالي أن رزق مصر رئيساً مثل مبارك” بتحمد ربنا على إية راجل يا طيب
وصحيفة جزائرية نشرت فتوى بإن الزلابية حرام ، آه بجد ، فتوى تحريم الزلابية ، وبعد كدا الشيخ كذب الصحيفة وقال إن الزلابية حلال وربنا حصل
وبعدين لاقيت خبر حادثة الدويقة بجد حاجه تزعل فعلا الله يرحم الضحايا وربنا يشفى المصابين يا رب
يوم غريب جدا جدا بجد ،من أولة أساسا وأنا مش مطمن ، من ساعة ماالست طلعت العدسة المكبرة وقالتلى ” ختم النسر مش باين ” مع إنه كان باين ، نسر دا ولا مش نسر؟

صمت الجبال · #13 11-20-2008, 08:53 AM

يوم جديد

النهاردة قلت اخرج امشى رجلى شوية رحت على قهوة المصريين لقيت واحد صاحبى من زمااان قلت اقعد معا دة وحشنى اوى ويا ريتنى ما جيت ولا شفتة

وفتح حوار عن
محدش عاجبه حاجة بالدنيا

العزابى بيقلك

يا عم انا عاوز اتجوز واشوفلى مرة واخلفلى ولد

يشيل اسمى اروح على بيتى الاقى مرتى عاملة الاكل الى بحبها

متدلعة متشيكة ومن تفتح نفصى

المتجوز الى مش مخلف ولا بنى ادم

يا عمى انا نفسى فى ولد يشيل اسمى

انا زهقن من بوجه البومة الى فى البيت ليل مع نهار

مش بكفى مستحملها كمان حارمانى من الاولاد

الى مخلف ولد او وبنات

ولك ينعن **** انتا وهى با بت اتهدى يا واد اتلم
نفسى انامشوية عاوز انخمد

انتى يا مرة تعالى خدى العيال دول احسن ااقوم ارميهم من البلكونة ******
تعالى سكتى اولادلك يا هانم
مش عارف لمين طالعين زى القرود

ياريتنى لا خلفت ولا اتجوزت

كنت ملك زمانى

بس انا*****الى جبت الهم لحالى

البنت الى مش متجوزة (عانس )

نفسى اتجوز واحد حلو وامور

لامتى هفضل كدة زهقت من نفسى ومن الرجالة
يا لهوتى مافيش راجل
والله لادلعه واهنيه واخليه اكتر انسان مبسوط فى الدنيا

بعد ما تتجوز

نيلة تنيلك من بين الزلام

الله بالينى بواحد لا بيفهم ولا بيتنيل

مش لو ربنا بعتلى راجل زى جوز بنت عمة خالة ابويا

الى بيشتغلش

يا عمى لامتى هفضل قاعد زى القرد بالدار

نفسى اشتغل احقق احلامى وطموحاتى

نفسى ابنى بيتى واشترى سيارة واشوف وحدة حلوة واحبها ونتجوز ونلف العالم

وبعدين أأسس شغل خاص فيا عشان اولادى من بعدى لازم يعيشو حياة سعيدة

الى بيشتغل

يا عمى انا زهقت من الشغلانة دى بقت حاجة مؤابدة
كل يوم بنصحى زى الحمير من صباح ربنا لاخر النهار

بنشتغل زى الجمال عشان شوية فلوس
يقطع الشغل على الى عاوز يتنيل يشتغل
والله لما كنت لسة طالب بالجامعة

كنت مكيف اكتر من كدة
وباخد فلوس اكتر من كدة
وكنت كل يوم بسهر واشوف اصحابى
يلعن ابوها من عيشة مقرفة

الطالب او الطالبة وهما لسة بالمدرسة

امتى يا عمى اخلص المدرسة بقى المقرفةدى

ونبطل نحمل شنطة ونلبس مريول المدرسة

ونداوم ونحل الواجب وناكل علقة لما نقصر

امتى نروح الجامعة نحس حالنا بنى ادمين عنجد

ودخلو الجامعة

يا عمى اية الجامعة المقرفةدى مش عارف اعلق ولا بنت حلوة

برة بامريكا عاملين الجامعة تقول فندق خمس نجوم

والى ماعاوز يروح على بيته فى غرفة اله وكمبيوتر ونت وكل شى بدك اياه

مش زى جامعاتنا تقول داخلين مزبلة

لسة المدارس ارحم امتى نتخرج ونشتغل

وما حدى عاجبو شي ؟

صمت الجبال · #14 11-20-2008, 01:59 PM

[frame="15 98"]
يوم فى حياتى
كانت ليلة

حبرها دمعي واحداثها لحظات من حياتي لن تنسى طالما حييت ....

في تلك الليلة الهادئة ..
وفي ساعاتها المتأخرة ..
كنت مستلقية على سريري ..
أستعيد ذكرياتي وأحداث حياتي السابقة ..
التي كانت تطرق بابي كل ليلة ..
وكالعادة استقبلتها كاستقبالي لها حين التقينا أول مرة !
كنت أعيش حياتي مع شخص لم أجد أجمل منه على وجه الأرض ..
ولا أحن من قلبه علي ..
ولا أدفئ من حضنه لي ..
ولا أرق من ابتسامته التي كانت تستقبلني صباح كل يوم جديد ..
كان هذا الشخص بمثابة الصديق وكان يمثل كل حياتي ..
كان الشمس التي تضيء دربي ..
والقمر الذي ينير ليلي ..
والنار التي تدفئني في ليالي الشتاء الباردة ..
كنا نعيش معاً حياة سعيدة ..
إلى أن حدث ما حدث لهذا الصديق !!
ودخل حياتنا ذلك الكابوس المريع عديم الرحمة ..
في يوم من الأيام ..
مرض مرضاً مستعصياً ..
رافقه هذا المرض طوال 12 عاما ..
حتى أصبح جزء منه ..
اشتدت حالته المرضية ..
وأصبحت حياتي يتملكها الرعب والشكوك ..
وأصبحت أكثر تعلقاً به وأكثر ملازمة له ..
وكان هو دائم الإلحاح علي بأن لا أتركه وحده ..
كنت أرافقه منذ ساعات الصباح الأولى إلى ساعات الليل المتأخرة ..
وفي يوم من الأيام قال لي ..
ينتابني شعور بأن حياتي أوشكت على النهاية ..
فقلت له إنك تعيش في أوهام وتخيلات ..
وكان من شدة الألم لا يستطيع النوم ..
وأنا كذلك ..
كيف سيغمض لي جفن وأنا أراه يتلوى ويتأوه من شدة المرض والألم !
كنت أقترب إليه إذا خلد للنوم ..
وأضع يدي بالقرب من أنفه ..
حتى أتاكد من أنه يلتقط انفاسه ..
كنت في كل مرة أجري فيها هذه التجربه ينتابني شعوور بأنني لن اشعر بتلك الانفاس ..
مع مرور الأيام .. اشتد عليه الألم !
فنقلته إلى المستشفى حتى يتلقى الإبر المسكنة ..
فكتب له المبيت فيها ..
ليأخذ هذه الابر التي كانوا يزعمون أنها تهدئ عليه آلامه..
وهي في الحقيقه لم تفعل ذلك ولو مرة من بين آلاف المرات ..

في هذه الأثناء .. بدأت الاختبارات النصفيه !
فأمرني بالذهاب الى المنزل وأن لا أعود إليه إلا بعد أن أُنهي اختباراتي بنجاح ..
ذهبت إليه يوم الأربعاء واستقبلني استقبالاً حافلاً لن أنساه طوال حياتي ..
بدأ الأسبوع الثاني ..
وفي يوم الأحد كنا مجتمعين في ساحة المدرسه نتهيء لبدء صلاه الظهر جماعة ..
حينها سمعت همسات وكيلة المدرسة في أذني تطلب مني الذهاب معها ..
ذهبت معها .. وسألتها ماذا جرى أهناك أمر قد حصل ؟
كان الصمت هو السمة السائدة طوال الطريق ..
حتى وصلنا إلى مكتبها ..
فقالت لي كيف حاله ؟
قلت إنه بخير !!!
فقالت: هل صحيح أنه مريض ؟؟
أخذت دقات قلبي تزداد وأخذ جسمي يرتعش !!
ولكني تمالكت نفسي وأجبتها وأنا في قمة القلق ..
نعم إنه في المستشفى ..
فقالت إذاً اذهب إليه ..
فصرخت والدموع تنهمر مني ..
ماااااااااذا حصل له؟ هل أصابه مكروه؟؟
فقالت: لا فقط طلب رؤيتك ..
خرجت مهرول ولم أدعها تكمل كلامها ..
ركبت السياره واتجهت إلى المستشفى ..
يااااه كم كانت المسافة طويلة ..
كان أطول طريق في حياتي !
وصلت إلى المستشفى مسرعة ..
والكل يرشقني بنظرات التعجب والاستغراب ..
أخيراً وصلت غرفته ..
ولكنني لم أجده على سريره ..
بكيت وبكيت وركضت ..
لأجده في العناية المركزه ..
كنت أحدق بالنظر إليه ..
والأجهزه تحيط به من كل مكان ..
دقيقة هي !!! حتى ارتفع رنين الجرس ..
وأصبحت الغرفه مزدحمة بالأطباء ..
طلبوا مني الخرج ..
كان جهاز إنعاش القلب يوضع فوق صدره مرة واثنتان ..
ولكن لم تفلح المحاولات ..
بين ذلك الضجيج وجهت لي عبارة (عظم الله أجرك) ..
أعلنوا وقت الوفاة !
ارتميت بين أحضانه ..
وتحدثت إليه ..
لعله يجيب ! ..
كنت أعتقد بأنه يمازحني ..
لم أتحمل وقع المفاجأة .. !
لم يجب علي ! ..
صرخت ! ..
وصرخت ! ..
وقلت له أرجوك لا تتركني وحيد !!
أخذت أنزع الاجهزه من على فمه برفق ..
وأغلق عينه تلبيه لرغباته التي كان يكررها علي . !
منذ ذلك الحين أصبحت وحيدة بظلام الدنيا الدامسْ ..
أسمع صدى صوتي في حياتي الخالية من أحب الناس إلي ..
أصبحت حياتي بدون شمس تنيرها ..
ولا نار تدفئها ..
بل أصبحت أعيش في برد قارس ..
من دون ظل ولا في ّ !
ولا قلب يحن علي ّ ..
أو حضن يسقيني من حنانه ..
ولا وجود لإنسان يمسح مدمعي !!

أتعلمون من هذا الشخص؟؟
إنه أعظم إنسان قابلته في حياتي ولن أقابل مثله !
إنه والدي
رحمك الله يا أبي

[/frame]

ramy1202000 · #15 11-20-2008, 03:28 PM

جميييييييييييييييييييييل جميييييييييييييييييييل استمر يا عسل

الذين يشاهدون محتوى الموضوع الآن : 1 ( الأعضاء 0 والزوار 1)

أدوات الموضوع
مشاهدة صفحة طباعة الموضوع أرسل هذا الموضوع إلى صديق